هادا الخليف من زمان كدا عرفناه
 

حاجين ولاداجين
احناكنازمان والا زماننا كان كيف
الزمن واحد ان كان شتي والا صيف
وأهل مكة خدموالحجاج بالرضي والكيف
واحنانفرح بالحج والحاج عندنا ضيف
من قبل ما يهل الشهر عفش البيت نفشعه
المساند الطرف والسجاني حتي الكرويت نرفعه
يترص كله في المبيت ولما يندرو الحجاج نرجعه
نأجر المقعد والديوان وجلستنا في الصفة والصيوان
ونخدم الحجاج كأنهم جيران ونديهم اللي ينقصهم ايش ماكان
من القدورللتباسي للصيجان
أهل مكة معروفين بالكرم والاحسان
ونفضى عاد للغريبة والمعمول تاني يومو
عساها عادة ماتنقطع طول العمر وتدوم
والعجينة كوم والتمرة بالسمسم كوم
ناس تحشي وناس تدردم وناس تنقش
من دي هرجةومن دي درجة ونضحك ونفرفش
واللي تغرز اللوزعلي الغريبةفي الصواني
مبسوسةبالسمن والهيل كده يحبوها أخواني
ونقسم علي جيراننا والحبايب
وندوق اللي حاضر ونشيل للي غايب
وفي سنة من ديكه السنين
ستي وخالتي ماكانوعلي الحج تامين
أمي قالت نخلف سوي والبنات قيدهم شبطانين
واتلمينا يوم الوقفه وكلنا صايمين
أخذنا فطورنا وعلي الحرم كنا رايحين
وفرشنا صفرة رمضانية بحق وحقيق
شربة وسمبوسك وفكينا الريق
صلينا المغرب وطفنا ومسكنا الطريق
وسمرنا في الخارجة علي الحنابل والمخدات
ونصبة الشاهي عليها البراريد والكاسات
الخوليف كان حلو بلمة الاهلية
ولقمة هنية تكفي مية
كل وحدة بخيرها جية
من خالتي فتوه ألين مرت خالي رقيه
اللي جايبة غريبة ومعمول
واللي باله ترمس وحلبة وفول
واللي شايلة نوقل وقدر مشخول
وجارتنا في يدها الطيران وتقول
موال وفرعي ودانة وبنتها تمضغ لبانه
يابختهم اللي حجو وياحصرة عللي خلفو ودجو
وقلنا نبا نسوي جوجو في العصرية
فيه بندق وقعقع وحمص ولوزية
ومعكوف وزرنباك وحلاوة موزية
وقروش وهلل وفصفص وحمصية
وطبلناوغنينا ونكتناها عالشمسية
علي راس حمدتوه ولدأختي فوزية
عاداتنا من زمان حلوة مكاوية
وسوينا القيس تاني يوم في الليل
وبدينا في اللبس والرقص والتمثيل
أما أمنا الغولة والدوجيرة جريو ورانا في الدحديرة
والعسكري ببدلتة البني والعمدة بعمتة يرقص ويغني
تالت العيد طلينا في الدهليزمستني
جا دورةبعد ماكان شبعان ومتهني
وسمي الدباح بسم الله وشفناه
واللحم دورنا علي الجيران قسمناه
هادا الخوليف كده من زمان عرفناه
مو الزمن اللي اتغير احنا اللي غيرناه
بس يبقي حنين لداك الزمان عشناه
ببساطتة وبركة أيامه حبيناه
خاص بالمكاويين